Energetika Nazirliyində ABŞ Beynəlxalq İnkişaf Agentliyinin (USAİD) Missiya direktoru ilə görüş keçirilib

ABŞ-ın müvəqqəti işlər vəkili Viliam Gill, ABŞ Beynəlxalq İnkişaf Agentliyinin (USAİD) Missiya direktoru Caydev Sinkx daxil olmaqla geniş nümayəndə heyəti Energetika Nazirliyində olub. Energetika naziri Pərviz Şahbazovla nümayəndə heyəti arasında keçirilən görüşdə iki ölkə, USAİD ilə Energetika Nazirliyi arasında enerji sahəsində əməkdaşlıq, “Elektrik Enerjisi Bazarı” haqqında qanun layihəsinə dair müzakirələr aparılıb.

Üzən günəş panelləri sistemi ilə bağlı pilot layihə həyata keçiriləcək

“Azərbaycan Respublikasında kommunal xidmətlərin (elektrik və istilik enerjisi, su və qaz) inkişafına dair Strateji Yol Xəritəsi”nin tam şaxələndirilmiş və ekoloji baxımdan təmiz elektrik enerjisi istehsalının təmin edilməsi hədəfinə uyğun olaraq Energetika Nazirliyi Asiya İnkişaf Bankının dəstəyi ilə üzən günəş panelləri sistemi ilə bağlı pilot layihə həyata keçirəcək.

İtaliyanın iqtisadi inkişaf nazirinin müavini Energetika Nazirliyində olub

Energetika naziri Pərviz Şahbazov İtaliyanın iqtisadi inkişaf nazirinin müavini Mikele Ceraçinin rəhbərlik etdiyi nümayəndə heyəti ilə görüşüb. Görüşdə müxtəlif sahələri əhatə edən Azərbaycan-İtaliya əlaqələrinin inkişafı, İtaliya şirkətlərinin iştirakı ilə həyata keçirilən layihələr və perspektiv əməkdaşlıq istiqamətləri barədə müzakirələr aparılıb.

Azərbaycan - İtaliya işgüzar görüşü keçirilib

İqtisadiyyat Nazirliyinin dəstəyi və Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Azərbaycan-İtaliya işgüzar görüşü keçirilib. İtaliya iqtisadi inkişaf nazirinin müavini Mikele Ceraçinin rəhbərliyi ilə nümayəndə heyəti, bir sıra dövlət qurumları, şirkət və iş adamlarının iştirakı ilə keçirilən işgüzar görüş nəqliyyat infrastrukturu və loqistika, yaşıl enerji və ətraf mühit, və kənd təsərrüfatı üzrə 3 tematik dəyirmi masa formatında keçirilib.

“ASAN Xidmət” mərkəzi vasitəsilə 131 hüquqi şəxsə icazə verilib

2018-ci ilin II rübü ərzində Energetika Nazirliyi tərəfindən ixrac nəzarətinə düşən malların (işlərin, xidmətlərin, əqli fəaliyyətin nəticələrinin) ixracı, idxalı və tranziti üzrə 105 hüquqi şəxsə icazə verilib. Bunlardan 87 icazə 5 saylı “ASAN Xidmət” mərkəzi vasitəsilə həyata keçirilib. Verilmiş icazələrin 82-si ixrac nəzarətinə düşən malların idxalı, 13-ü ixrac nəzarətinə düşən malların ixracı, 10-u isə ixrac nəzarətinə düşən malların tranziti ilə bağlı icazələr olub.

Azərbaycanın iyun ayında gündəlik neft hasilatı ilə bağlı məlumatları OPEC-ə təqdim edilib

Azərbaycanda iyun ayı ərzində gündəlik neft hasilatı 792 min barrel olub. Bunun 739 min barrelini xam neft, 53 min barrelini kondensat təşkil edib. Gündəlik 622 min barrel xam neft, 53 min barrel kondensat, 12 min barrel isə neft məhsulları ixrac edilib. Energetika Nazirliyi iyun ayı ərzində gündəlik neft hasilatı ilə bağlı məlumatları OPEC-in Birgə Monitorinq Komitəsinin Müştərək Texniki Komissiyasına təqdim edib.

2018-ci ilin I yarısı üzrə Energetika Nazirliyində 868 müraciətə baxılıb

Cari ilin yanvar-iyun ayları ərzində Azərbaycan Respublikasının Energetika Nazirliyinə və nazirliyin tabeliyində olan Enerji Məsələlərini Tənzimləmə Agentliyinə istehlakçıların hüquqlarının qorunması, abonentlərin elektrik enerjisi və təbii qazla təchizatı ilə bağlı 868 ərizə və müraciət daxil olub. Bunlardan 149 müraciət “Qaynar xətt” (“Elektron müraciət”), 657 müraciət isə poçt vasitəsilə qəbul edilib. Nazirliyin telefon nömrələrinə 37, teleqramla isə 25 şəxs müraciət edib.

Ərəb Neft İnvestisiyaları Korporasiyasının nümayəndə heyəti Energetika Nazirliyində olub

Energetika Nazirliyində energetika nazirinin müavini Samir Vəliyevlə Ərəb Neft İnvestisiyalar Korporasiyasının (APICORP) İdarə Heyətinin sədri, Səudiyyə Ərəbistanı Krallığının enerji nazirinin müavini Dr. Aabed Al-Sadoun rəhbərlik etdiyi nümayəndə heyəti ilə görüş keçirilib. Görüşdə Korporasiya ilə Azərbaycan arasında enerji sahəsində əməkdaşlığın inkişafına dair müzakirələr aparılıb.