Energetika Nazirliyi yanında ictimai şuraya seçkilərin vaxtı təyin edilib

Azərbaycan Respublikasının Energetika Nazirliyinin fəaliyyət istiqamətləri üzrə hüquqi aktların qəbulunda, nazirliyin fəaliyyətinə ictimai nəzarətin təşkilində vətəndaşların və vətəndaş cəmiyyəti institutlarının iştirakını təmin etmək məqsədilə yaradılacaq ictimai şuraya namizədlərin qeydiyyat müddəti başa çatıb və seçkilərin vaxtı təyin edilib. İctimai şuraya seçkilər 18 mart 2021-ci il tarixində saat 11:00-da Energetika Nazirliyinin (ünvan: Ü.Hacıbəyli küçəsi 84, Hökumət Evi) iclas zalında birgə yığıncaq şəklində keçiriləcəkdir. 
Seçkilərdə səsvermə hüququ əldə etmək istəyən vətəndaş cəmiyyəti institutlarından 8 mart tarixinədək öz təmsilçiləri (1 nəfər olmaqla) haqqında zəruri məlumatları – adı, soyadı, atasının adı, təvəllüdü, yaşayış yeri və əlaqə vasitələrini ehtiva edən cədvəli, həmçinin şəxsiyyət və üzvlük vəsiqələrinin surətini terane.gozelova@minenergy.gov.az elektron poçt ünvanına göndərməklə Seçki Komissiyasına təqdim etmələri xahiş olunur.
İctimai şuranın üzvləri irəli sürülmüş namizədlər içərisindən gizli səsvermə yolu ilə seçiləcəkdir. Səsvermədə iştirak edənlərin yarıdan çoxunun səsini toplamış şəxslər ictimai şuranın tərkibinə seçilmiş hesab olunurlar. 
Məlumat üçün bildirək ki, Energetika Nazirliyi yanında ictimai şura üzvlüyünə 10 nəfərin namizədliyi qeydə alınıb. Seçki Komissiyası tərəfindən ictimai şura üzvlərinin say həddi isə 7 nəfər müəyyən edilib.
Energetika Nazirliyi yanında ictimai şuraya seçkilərin keçirilməsi və seçilən vətəndaş cəmiyyəti institutları ilə bağlı məlumatlar nazirliyin rəsmi internet səhifəsində (www.minenergy.gov.az) yerləşdiriləcəkdir.