Türkdilli Dövlətlərin Əməkdaşlıq Şurasının energetika nazirlərinin və energetika üzrə işçi qrupunun iclasları keçiriləcək

Fevralın 23-də Türkdilli Dövlətlərin Əməkdaşlıq Şurasının (TDƏŞ) energetika üzrə işçi qrupunun 1-ci iclası, fevralın 24-də isə energetika nazirlərinin 1-ci görüşü videokonfrans formatında keçiriləcək. 
Ölkəmizin təşkilata sədrliyi dövründə baş tutacaq videokonfransda Azərbaycan, Qazaxıstan, Qırğızıstan, Türkiyə, Özbəkistanın energetika nazirləri və yüksək səviyyəli nümayəndələri iştirak edəcək.
Xatırladaq ki, 15 oktyabr 2019-cu ildə Bakıda keçirilmiş Türkdilli Dövlətlərin Əməkdaşlıq Şurasının VII Zirvə Görüşündə Türk Şurasına sədrlik Qırğızıstandan Azərbaycana keçib. Azərbaycan, Qazaxıstan, Qırğızıstan, Türkiyə və Özbəkistan Türkdilli Dövlətlərin Əməkdaşlıq Şurasının üzvləridir. Macarıstan isə müşahidəçi qismində iştirak edir.