Dünya Neft Şurası (DNŞ)

Dünya Neft Şurası (DNŞ) - Birləşmiş Krallıqda yerləşən və BMT tərəfindən akkreditə olunmuş siyasi olmayan Qeyri Hökumət Təşkilatıdır.

Təşkilatın 65 üzvü var və dünya üzrə bütün neft istehsalçıları və istehlakçılarının 95%-ni təşkil edir. Dünya Neft Şurasının Prezidenti 2017-ci ildən etibarən Tor Fjaerandır (Norveç).

DNŞ-in əsas fəaliyyəti dünya neft qaynaqlarının bütün ölkələr üzrə səmərəli istifadəsinə və onların davamlı idarə olunmasının inkişafına həsr olunub.

DNŞ-nın əsas məqsədi yerli və xarici maraqlı tərəflərin texniki, sosial, ətraf mühit və idarəetmə üzrə yaranmış qlobal çətinliklərin öhtəsindən daha effektiv yolla gəlməsi üçün onların arasında dialoqların sürətləndirilməsini təşkil etməkdir.

DNŞ-ya üzv olmaq istəyən hər bir dövlət ölkə üzrə neft sahəsində fəalliyyət göstərən şəxslərdən ibarət Milli Komitə yaratmalıdır. Azərbaycan Respublikasının Milli Neft Komitəsi (NOCRA) 8 iyul 2005-ci ildə yaradılıb.

Dünya Neft Konqresi (DNK) - Dünya Neft Şurası hər üç ildən bir qlobal neft və qaz məsələlərinin müzakirə olunması üçün DNK təşkil edir. DNK neft ehtiyatlarından effektiv istifadə, bu sahədə  innovasiyaların tətbiqi, neft-qaz istehsalçıları və istehlakçıları arasında təcrübə mübadiləsi üzrə tanınmış beynəlxalq platformadır.

1 il boyunca davam edən təbliğat işlərindən sonra Şura üzvləri DNK-ya növbəti dəfə ev sahibliyi edəcək ölkəni gizli səsvermə yolu ilə 4 il qabaqcadan Şura İclası zamanı seçirlər.

Sonuncu-22-ci DNK 2017-ci ildə Türkiyənin İstanbul şəhərində keçirilib. Növbəti 23-cü DNK 2020-ci ildə ABŞ-ın Hyuston, 24-cü DNK isə 2023-cü ildə Kanadanın Calgary şəhərində keçiriləcək.

9 yanvar 2019-cu il tarixində DNŞ-nin 2023-cü ildə keçiriləcək 24-cü DNK-ya ev sahibliyi etmək üçün Azərbaycan namizədliyini irəli sürüb. Azərbaycanla yanaşı, Kanada, Birləşmiş Ərəb Əmirlikləri, Argentina və Qazaxıstan da namizəd ölkələr sırasındadır. 2019-cu il 23 iyun tarixində Rusiyanın Sankt-Peterburq şəhərində baş tutmuş DNŞ-nin Şura İclası zamanı keçirilmiş səsvermədə Azərbaycan Kanada ilə finala qalaraq 1 səs fərqi ilə (21-20) ikinci olub.

Dünya Neft Şurası Liderlik Konfransı - Neft sənayesinin liderliyinə yönəlmiş beynəlxalq əməkdaşlıqda dayanıqlı inkişafın prioritet təşkil etdiyi platformaya duyulan ehtiyacı nəzərə alaraq, DNŞ yeni bir təşəbbüs təqdim edərək 2015 və 2019-cu illərdə Dünya Neft Şurası Liderlik Konfransları təşkil edib. Bu Konfransların məqsədi neft sənayesinin mövcud olduğu müxtəlif ölkələrdəki sözügedən sahənin liderlərini bir araya toplayaraq daha əlverişli texnologiyaların paylaşılması və təcrübə mübadiləsinin aparılmasını təşkil etməkdir.

1-ci Liderlik Konfransı Norveçin Tromso şəhərində, 2-ci Liderlik Konfransı isə Hindistanın Mumbai şəhərində keçirilib. Bu tədbirdə Energetika Nazirliyinin nümayəndə heyəti iştirak edib və 24-cü DNK-nin Bakı şəhərində keçirilməsi üçün təbliğat işləri aparıb.

Dünya Neft Şurası Gənclər Forumu - Gənclərin neft və qaz sektorunda artan fəaliyyətini nəzərə alaraq üç ildən bir Dünya Neft Şurası Gənclər Forumu keçirilir. İlk Gənclər Forumu 2004-cü ildə Yunanıstanın Afina şəhərində, sonuncu isə 2019-cu ilin 23-28 iyun tarixlərində Rusiyanın Sankt-Peterburq şəhərində keçirilib.