Avropa İttifaqının İqlim və Enerji üzrə Merlər Razılaşması təşəbbüsü Avropa Komissiyası tərəfindən dayanıqlı enerji siyasətinin hazırlanması və həyata keçirilməsində yerli özünüidarəetmə orqanları tərəfindən göstərilən səylərin dəstəklənməsi məqsədi ilə irəli sürülüb.

Merlər Razılaşmasının əsas hədəfləri enerji səmərəliliyi tədbirlərini həyata keçirmək, bərpa olunan enerji mənbələrindən istifadəni genişləndirməklə istilik effekti yaradan qaz emissiyalarını azaltmaq, iqlim dəyişikliklərinə uyğunlaşmada dözümlülüyü artırmaq, bələdiyyələr, yerli və mərkəzi icra hakimiyyəti orqanları arasında əməkdaşlığı gücləndirmək, eləcə də təhlükəsiz, dayanıqlı və etibarlı enerjiyə əlçatanlığı təmin etməkdir.

2018-ci il 24 sentyabr tarixində Avropa Komissiyası Energetika Nazirliyini Avropa İttifaqının İqlim və Enerji üzrə Merlər Razılaşmasının Azərbaycan üzrə Milli Əlaqələndiricisi kimi qeydiyyata alıb və “Merlər Razılaşmasının Milli Əlaqələndiricinin Bəyannaməsi” ilə müəyyənləşdirilmiş səlahiyyətlərinin icrasına icazə verib.

Energetika Nazirliyinin 08 noyabr 2018-ci il tarixli 86 nömrəli əmri ilə Avropa İttifaqının İqlim və Enerji üzrə Merlər Razılaşmasının Milli Əlaqələndiricisinin 2019-cu il üzrə İş Planı təsdiq edilib.

2018-ci ildə Azərbaycandan Mingəçevir bələdiyyəsi və “İçərişəhər” Dövlət Tarix- Memarlıq Qoruğu İdarəsi, 2020-ci ildə isə Şəki, Gəncə, Yevlax, Qazax, Şamaxı və Xaçmaz bələdiyyələri Merlər Razılaşmasına qoşulub.

2021-ci il 7-8 iyun tarixlərində «Merlərin  Razılaşması təşəbbüsü - Öhdəliklərdən həyata keçirilməyə doğru» adlı ölkəyə məxsus təlim seminarı keçirilib. Təlimdə Energetika Nazirliyinin, Merlər Razılaşmasına qoşulan Bələdiyyələrin və "İçərişəhər" Dövlət Tarix-Memarlıq Qoruğu İdarəsinin nümayəndələri, Aİ-nin Azərbaycan üzrə Nümayəndəliyinin təmsilçisi, Beynəlxalq donor  təşkilatlarının (BMTİP, AİB, AYİB) nümayəndələri və MR-Şərq - II  TY Layihəsinin  komandası iştirak edib. Təlim Dayanıqlı Enerji və İqlim üzrə Fəaliyyət Planının hazırlanması: 2030-cu ilədək CO2-nin azaldılması hədəfinə addım-addım yanaşma və s. kimi mövzuları əhatə edib. 

Hazırda Bələdiyyələrlə  Dayanıqlı Enerji və İqlim üzrə Fəaliyyət Planının işlənib hazırlanması  istiqamətində zəruri tədbirlərin görülməsi üçün işlər davam etdirilir. Belə ki Merlər Razılaşması Təşəbbüsünün artıq 3-cü mərhələsi başlanıb. Bununla bağlı 2021-ci ildə Avropa Komissiyası tərəfindən tender elan edilib və tenderin qalibi “Energy Cities” konsorsiumunun ekspertləri seçiliblər.

2022-ci ilin 13 aprel tarixində Merlər Razılaşması proqramının 3-cü mərhələsinin Başlanğıc fazası çərçivəsində  MR komandasının Azərbaycana ilkin səfəri  çərçivəsində Azərbaycanın Merlər Razılaşması təşəbbüsünə qoşulan yerli özünüidarəetmə orqanları üçün Dayanıqlı Enerji və İqlim Fəaliyyət Planının (SECAP) hazırlanması məqsədilə Bələdiyyə nümayəndələri üçün ilkin təlim seminarı, o cümlədən Təşəbbüsə qoşulmuş 6 yeni Bələdiyyə üçün Razılaşmaya qoşulmanı əks etdirən sənədin təltifetmə mərasimi keçirilib.