Xəbərlər

ExxonMobil şirkətinin Azərbaycan üzrə yeni təyin olunmuş baş meneceri Energetika Nazirliyində olub

26 iyul 2016

     Energetika naziri Natiq Əliyev ExxonMobil şirkətinin Azərbaycan üzrə baş meneceri Elister Maklidin (Alistair MacLeod) rəhbərlik etdiyi nümayəndə heyətini qəbul edib. Azərbaycanla enerji sahəsində əməkdaşlıq əlaqələrinin ExxonMobil üçün mühüm rol oynadığını vurğulayan E.Maklid fəaliyyət müddətinin başa çatması barədə məlumat verərək, yeni baş menecer vəzifəsinə təyin olunmuş Jan Age Hanseni təqdim edib. Görüşdə “ExxonMobil”in Azərbaycan layihələrinə yeni menecerin rəhbərlik etdiyi dövrdə də əməkdaşlıq əlaqələrinin inkişaf edəcəyinə əminlik ifadə olunub. Azərbaycanda fəaliyyət göstərən ilk beynəlxalq neft və qaz şirkətlərindən biri kimi “ExxonMobil”in keçdiyi tarixi yola nəzər salınıb. “Azəri-Çıraq-Günəşli” (AÇG) layihəsində" 8% paya malik şirkətin enerji əməkdaşlığına verdiyi töhfələrdən bəhs olunub. “ExxonMobil” şirkətini etibarlı tərəfdaş kimi dəyərləndirən Natiq Əliyev bildirib ki, şirkət təkcə enerji layihələri ilə deyil, həm də iştirak etdiyi müxtəlif sosial proqramlarla mühüm nailiyyətlərə imza atıb. Beynəlxalq müqavilələrdən irəli gələn öhdəliklərə tam əməl olunduğunu qed edən energetika naziri bundan sonrakı dövr ərzində də “ExxonMobil”in təcrübəsi və imkanlarından bəhrələnməyə ehtiyac olduğunu diqqətə çatdırıb. Əməkdaşlığın genişləndirilməsi və bu istiqamətdə mümkün perspektivlər müzakirə edilərək, yeni menecerə fəaliyyətində Azərbaycan tərəfindən dəstək ifadə olunub.