Xəbərlər

Energetika naziri Moskvada bir sıra görüşlər keçirib

04 oktyabr 2018

    Azərbaycanın energetika naziri Pərviz Şahbazov “Rusiya enerji həftəsi” adlı Beynəlxalq Forum çərçivəsində bir sıra görüşlər keçirib. Macarıstanın xarici işlər naziri və ticarət naziri Peter Siyarto ilə görüşdə “Cənub Qaz Dəhlizi”nin icra vəziyyəti, genişləndirilmə perspektivləri  və  növbəti mərhələdə ötürücülük qabiliyyətinin artırılması məsələləri müzakirə edilib. Peter Siyarto Macarıstanın gələcəkdə “Cənub Qaz Dəhlizi" layihəsində  iştirakda  maraqlı olduğunu  diqqətə çatdırıb və iki ölkənin müvafiq nazirlikləri arasında  dialoqun aparılmasının vacibliyini qeyd edib.  Söhbət zamanı Azərbaycanla Macarıstan arasında enerji sahəsində əməkdaşlığın digər istiqamətləri ətrafında da fikir mübadiləsi aparılıb.
  Energetika naziri Pərviz Şahbazov həmçinin Monqolustanın energetika naziri Çerenpilin Davasurenlə də görüşüb. Nazir Monqolustanın 2020-ci ildə Enerji Xartiyası Konfransına sədrlikdən Azərbaycanın xeyrinə imtina etdiyinə görə təşəkkürünü bildirib.
    Görüşdə iki ölkə arasında enerji sektorunda, xüsusilə neft-qaz sahəsində geoloji kəşfiyyat işləri üzrə əməkdaşlıq perspektivləri müzakirə edilib. Monqolustan tələbələrinin Azərbaycanın müvafiq ali məktəblərində neft-qaz ixtisası üzrə təhsil imkanları nəzərdən keçirilib.